Op vri-jdagaovend 21 fibrewari is d'r met 't onthulle van 't monument 'n start gemaak met de carnaval in Waskuupstad. Bi-j die officiële oapening heurt de uutreiking van 'n aantal hoge onderscheidinge. De Berghse Kei is dit jaor uutgereik aan Chris Ruikes uut Stökkum.

De Berghse Kei is de hoogste onderscheiding van carnavalsvereniging d’Olde Waskupen den jaorlijks uutgereik wödt aan 'n groep of persoon den zich op sociaal-cultureel of maatschappelijk gebied ingezet het veur de hele regio. De Berghse Kei wier uutgereik op 't Hof van Hedel in verzörgingshuus Gertrudis. Deze onderscheiding is bi-jveurbeeld al gegaon naor de stichting Kunst en Kunstig, MvR, Stichting Sinterklaas in Bergh, Montferland run, Okidoki Radio, IJsbrand Nijhof en Pastoor Nollen.

Dit jaor geet die eer uut naor Chris Ruikes uut Stökkum. Chris wier vri-jdagaovend rond half 9 benuump tot ‘Ridder in de orde van de Berghse Kei’. Chris kreg deze hoge onderscheiding um heel vol redene. Hij is erelid van 't koor Inter Nos uut Stökkum. Hij is veurzitter van stichting De Zonnebloem in ’s-Heerenbarg, Azum, Lengel en Stökkum. Veurzitter van de 50+ bowlingclub, al 52 jaor vri-jwilliger op 't kasteel. Dik 40 jaor geleje is hij met 'n paar andere minse begonne met 't ondersteune van Terre des Hommes in Stökkum en ze hebbe onder meer met 't organisere van paasmarkte en rommelmarkte al meer dan € 100.000 opgehaal veur dit goeie doel. Hij is lector en veurganger bi-j kerkdienste. Hij is coördinator van de Nierstichting en 3 jaor sikretaris gewèès bi-j de Leertrekkers in Stökkum. Hij is 18 jaar secretaris gewèès van vv Stökkum en daordeur ook lid van verdienste. Hij het 25 jaor in de organisatie van 't Oranje- en Sinterklaoscommité gezète en in 2008 is hij lid gewodde in de Orde van Oranje Nassau. En nève al deze activiteite het hij ook gewoon gewark en 39 jaor les gegève aan de school in Stökkum. Now is hij met pensioen, maor nog steeds arg actief.

Commandeurs
Naos de Berghse Kei wodde jaorlijks commandeurs in de orde van d’Olde Waskupen benuump. De raod van 11, de old-prinse en 't bestuur drage ieder jaor iemand aan den zich arg verdienstelijk het gemaak veur 't carnaval in ’s-Heerenbarg. Den eer ging dit jaor uut naor Gaby Berendsen, Michel Moll en de carnavalsgroep CV van Alles Wat.
Gaby is al jaore actief bi-j de carnavalskran. Zi-j zörg al jaore veur de opmaak van de krant. Daornaos ontwerp zi-j met eur eige bedrijf belangeloos de onderscheidinge veur zowel de prins as de jeugprins.
Michel is jaorelang kartrekker en sikretaris gewèès bi-j de jeugcommissie. Daornao is hij veurrzitter gewodde van de Pers en Propagandacommissie. Daoronder vilt alle PR van de vereniging, maor ook de carnavalskrant en bi-jveurbeeld 't plekplaatjesboek en 't kommende jubileumboek
De carnavalsgroep CV Van Alles Wat is 'n carnavalsgroep den al sins 2007 metlup in de optochte. Extra trots ware ze toen de leje Eckhard Gramentz, Stefan Tersteeg en Geraldo Brugman 't carnavalsjaor 2017 onder motto 'Zo heurt 't!' as prins en adjudante veur ginge. Veurig jaor april sloeg 't noodlot toe en brandde hun hele bouwplaats af waorin ze altied feesjes gave, maor ook de carnavalswage bouwde. Ze raakte ech alles kwiet. Maor ze hebbe de scholders d'r onder gezet en doen dit jaor, ondanks alle tegeslag, weer met aan de optoch.

Twee speciale commandeurs
Dit jaor wodde d'r twee extra commandeurschappe uutgereik aan twee bisundere minse uut ’s-Heerenbarg die jaore lang heel vol veur de hele gemeenschap gedaon hebbe. Harrie en Riet IJzermans. De twee uutbaters van grenscafé De Peer. Harrie en Riet zun d'r eind veurig jaor met gestop. De Peer is 'n café dat al sins 1806 besteet en Harrie was de 5e generatie den as uutbater op 't grenscafé zat. Zi-j hebbe niet alleen 't carnaval groot gemaak in Waskuupstad maor organiseerde ook tentfeeste, liete groepe wages bouwe in den tent, boa-je onderdak aan carnavalsvereniginge, maor zörgde d'r met hun zaal en kroeg ook veur dat vol vereniginge uut ’s-Heerenbarg onderdak hadde. Enkele veurbeelde daorvan zun Het Grensland Orkest, Bad Habit, de Barghse Jonges, de dansgarde en de schietvereniging. Ook steet Riet bekend um eur koakkunste waorbi-j zi-j zörgde veur goed ète veur heel vol verschillende groepe en bezuukers. Zi-j zijn now met 't café gestop, maor helpe de ni-je eigenare dit jaor zeker nog met de carnaval.