De hoogste onderscheiding van carnavalsvereniging d’Olde Waskupen is uutgereik aan de vri-jwilligers van woonzörgcentrum en verpleeghuus Gertrudis in ’s-Heerenbarg. Zi-j kregge op vri-jdagavond 9 fibrewari uut hande van Prins Thiemo I de Berghse kei eûverhandig.

Jaorlijks reik d'Olde Waskupen de Berghse Kei uut aan 'n persoon of instelling den zich op maatschappelijk of sociaal-cultureel gebied verdienstelijk het gemaak veur de samelèving. Dit keer ging die eer uut naor de vri-jwilligers van 't Gertrudis, waordeur zi-j in 't vervolg deur 't lève gaon as Ridder in de orde van de Berghse Kei. In 't eige Hof van Hedel (binneplaats van 't Gertrudis) kregge vri-jwilligers Netje Berndzen-Kniest, Wilco van den Berg & Gert Wassink deze onderscheiding. Z-ij fungeerde as de drie ambassadeurs van alle vri-jwilligers.
Deur de bezuuniginge in de zörg en juus in deze tied, wanneer de zörgvraog arg hoog is, kriege de warknemmers van Gertrudis vol veur hun kieze. D'r is haos alleen tied veur echte zörg en minder tied veur de minselijke kant. Daor zette de vri-jwilligers van 't Gertrudis zich veur in. Zi-j make veur de minse 't verschil tusse gewoon old wodde en fijn old wodde. Zi-j bestede hun vri-je tied, same met de verzörgsters van de dagbesteding van 't Gertrudis, aan activiteite met de minse. Denk daorbi-j aan bi-jveurbeeld spelaovonde, wandelingen make, koffie schenke of krant lèze. Zi-j make 't veur de bewoners van 't Gertrudis aangenamer op hun olde dag.

Commandeurs in de orde van d’Olde Waskupen
Drie andere belangrijke onderscheidinge die al eerder op den aovond uutgereik wiere zun de commandeurs in de orde van d’Olde Waskupen. Dit gebeurde nao 't onthulle van 't monument op 't Stadsplein. Commandeurs zun minse die zich ingezet hebbe veur 't carnavalsfees in Waskuupstad. Zowel binne de vereniging as in buurte en straote.

Francina Te Boai-j wier benuump tot commandeur in de orde van d’Olde Waskupen, umdat zi-j heel arg betrokke is gewèès bi-j 't carnavalsfees in Waskuupstad. Daornaos is zi-j al jaore actief veur de Heemkundekring Bergh en de pastorie en het zi-j sins eind maart same met eur man Hans hotel Heitkamp eûvergenomme. Same hebbe zi-j d'r veur gezörg dat ook now 't carnavalsfees in Heitkamp blif bestaon. Ook het zi-j eur man de ruumte geèeve um vol tied te stèke in de Buutcommissie van d’Olde Waskupen met onder andere as gevolg de pronkzitting XL zoas wi-j den now kenne.

René Loskamp kreg het commandeurschap veur zien wark binne de buurtvereniging van de Van Rooijenstraot en de Touwslagersbaan. Ook het hij 'n leidende rol bi-j de carnavalsvriendenclub de Lutsers. Daornaos spolt hij in 't Hausz orkest dat sins jaor en dag de muzikale umlijsting verzörg bi-j de jeugpronkzittinge. René is bestuurslid van Harmonie Crescendo en de zwem & poloclub Montferland. Ook is hij arg druk veur Brandweer Bergh en de organisatie van de concerte van de Barghse Jonges.

Fred Willemsen kreg 't commandeurschap, mede dankzij zien verdienste binne de carnavalsvereniging. Hij het jaore bi-j de Raod van XI gezète, zat in 't bestuur van de vereniging as penningmeester en is daornaos ook al jaore actief as één van de zangers bi-j de Barghse Jonges. Veur 't kommende concert van de Barghse Jonges in 2018 is hij weer de penningmeester van de stichting.

Ook wier 'n speciale onderscheiding uutgereik aan de bedenker van 't carnavalsmotto van 2018 ‘Daor geet ’t um’. Den eer ging dit jaor uit naor Pieter Hendrikse. Pieter leverde veurig jaor, net as old-prins Jan Meuleman, 't motto in, dat uuteindelijk deur de Olde Joekels gekoaze wier tot 't motto van 2018.