Wie wödt de ni-je prins? Op den vraog kriege ’s-Heerenbarg en de regio antwoord met de pronkzittinge van carnavalsvereniging d’Olde Waskupen. Op vri-jdag 9 en zaoterdag 10 november um 11 veur 8 begint de prinsenprisentatie, waornao d'r met 'n ni-je hoogheid 'n begin gemaak kan wodde aan 't ni-je carnavalsjaor. De kaartverkoop veur deze leuke aovond vol humor en vermaak is veurige wèèk begonne bi-j de bekende verkooppunte.

Begin juli is d'r deur de leje van carnavalsvereniging d’Olde Waskupen al gestemp op 'n ni-je prins. Den het zich lang stil motte holde, maor mag zich ruum vier maonde later eindelijk prisenteren aan alle aanwezige carnavaliste in de zaal. De veurbereidinge veur deze pronkzittinge lopen al minstes net zo lang. De buutcommissie is d'r ook dit jaor weer in geslaag um 'n vol, maor veural ook gevarieerd programma op pote te zette, met veur ieder wat wils. Zang, muziek, dans en buuts. Vermaak veur jong en old. Alles passeert de revue. Met as pronkstuk natuurlijk de prinsenprisentatie.

Ook dit jaor staon d'r met de pronkzitting veur de volwassene weer verschillende artieste op 't podium. Ni-je, ervare, jonge en olde artieste. Zoas ieder jaor is de muzikale umlijsting in hande van de Blaoskapel. Kortum, alle ingrediënte zun aanwezig um d'r same met de vriendegroep, familie, kennisse of buurt 'n gezellige aovond van te make in sportcentrum Laco te ’s-Heerenbarg.

Jeugpronkzitting
Maor de Prins is niks zonder zien jeugprins en 't jeuggevolg. Op zaoterdagmiddag wödt duudelijk wie d'r aan d'r nève de grote prins regeert eûver Waskuupstad met de carnavalsdage. Um 13.30 uur begint den middag vol dans en muziek. De buutschool het ook dit jaor weer eur stinkende bes gedaon um same met de jeugdige carnavaliste uut ’s-Heerenbarg 'n mooi programma in mekaar te drèè-je. Veur de jeugpronkzitting zun gin kaarte neudig, maor wèès wel op tied want vol=vol.

Kaarte veur de pronkzittingaovonde zun te koop bi-j Kachelhöltjes Party Pret, Resto de Bongerd en Bakkeri-j Diekman.