Ons bereikte 't droevige ni-js van 't eûverlijde van mevrouw Netje Berndzen-Kniest. Netje, zoas iedereen eur kende, was 'n gemeenschapsmins bi-j uutstek.

As d’Olde Waskupen ware wi-j trots op eur vole optrejes met onze pronkzittinge in de jaore zestig en zeuvetig. Met eur prachtige stem en eur mooie liedjes eûver ’s-Heerenbarg oogstte zi-j altied vol succes. Veural eur liedjes “Heimwee“ en “Eén ’s-Heerenbarg” uut 1967 ware toppers. Op bi-jgevoegde foto zie-j eur met eur optreje met "Olde Waskuupliedjes", afgelope september bi-j Heitkamp.

Netje het zich niet alleen op de bühne van d’Olde Waskupen laote gelde. Zo was ze van 1973 tot 1986 as raodslid en wetholder van de gemeente Bargh nauw betrokke bi-j de gemeentelijke politiek. Daornaos bestuurslid van 't Jeugdcentrum Bergh, provisor van 't Gasthuus Sint-Gertrudis. Ook is zi-j veurzitter gewèès van 't gemengd zangkoor Bergh Opwaerts en langdurig lid van toneelvereniging Alphons Ariëns.

Netje beheurde tot 'n bisunder selek gezelschap die zich holder van De Eremedaille der gemeente Bergh moch nuumen. Veur al eur wark veur de ’s-Heerenbargse gemeenschap ontving zi-j in 1994 'n koninklijke onderscheiding. In 2000 nam zi-j as veurzitter van de Heemkundekring Bergh de Berghse Kei in ontvangs. In 2018 kreg zi-j as één van de vri-jwilligers van Gertrudis veur hun vri-jwilligerswark de Berghse Kei nogmaals.

's-Heerenberg velös 'n betrokke gemeenschapsmins.