Carnavalsvereniging d’Olde Waskupen het in eur roemruchte geschiedenis vol artieste en muzikante op de Bühne gehad. Eén van deze muzikante is Martin Jansen sr. den veur d’Olde Waskupen menig liedje het gecomponeerd. In 1956 schreef hij, onder 't pseudoniem Martin Jarroo, de eerste echte Berghse carnavalsschlager “’t Bänkske”. 'n Liedje dat toen en tot ver in de jaore 70 van de veurige eeuw 'n hit was en onder andere werd gebruuk in de muzieklesse op de lägere schole.

Martin Jansen sr. - In 1960 as dirigent van Harmonie Crescendo zoas vol minse um nog kenne.

Bänkskes op de Wallebult

't Is menig ’s-Heerenbergenaar opgevalle dat 't aantal en de toestand van de nog aanwezige bänkskes op de wal veur verbètering vatbaar zun. Zo ook Hans te Boai-j en Francina te Boai-j - Massop.

Dit jaor besteet Industrial parts te Booy b.v. 60 jaor wat onder andere is gevierd met 'n grandioos oape huus. 't Management van Te Booy het daornaos ook besloate um, ter gelegenheid van dit jubileum, iets aan de ’s-Heerenbargse gemeenschap te schenke.

Samewarking

Industrial parts te Booy b.v. en d’Olde Waskupen hebbe de hande ineen geslage en zörge d'r veur dat d'r weer bänkskes komme op de wal. 't Is echter niet alleen de samewarking tusse deze twee patti-je die dit meugelijk mik. Ook Stichting Huis Bergh, Keizer Metalen en Dijkman Coating warke geheel belangeloos met in dit initiatief. Daornaos wödt gebruuk gemaak van de gifte die met 't oape huus zun geschonke um 'n deel van de koste te dekke. De bänkskes wodde gemaak deur de leerlinge van Bedrijfstakschool Anton Tijdink en geplaats deur Montferland Hoveniers.

Eerbetoon

Zoas hierveur al beschreve is Martin Jansen sr. verantwoordelijk veur de eerste echte Berghse carnavalshit en zun d'r daornao nog vol gevolg maor dat was niet zien enige verdienste. De heer Janse was regionaal bekend as dirigent van verschillende harmonie-je, orkeste en fanfares. Ook was hij grondlegger en directeur van de Berghse muziekschool en gaf hij muziekles op de St. Paulus MAVO. Hij wed in 1984 as eerste echte 's-Heerenbergenaar tot ridder in de orde van de Berghse Kei benuump. Hij kreg deze hoge onderscheiding veur al 't gedaone wark veur 't muzikale en culturele lève in Bargh en wie-je umgèving, met name veur zien wark veur de muziekschool Bergh.

Ter naogedachtenis aan de in 2002 eûverleje heer Jansen wödt 11 juli aanstaonde um 15.00 uur, geliek met 't eûverdrage van de bankskes, 'n plaquette met de teks van 't liedje “’t Bänkske” op de Wallebult onthuld. 't Liedje 't Bänkske wödt same met nog andere schlagers met de onthulling gebrach deur de Blaoskappel.

Hierbi-j alvas de teks veur de minse die met wille zinge met de onthulling:

‘t Bänkske bi-j de Wallebult, steet al menig jaar.
En wach daor met völ geduld, op ’n vri-jend paar.
As ’t Bänkske praote kon, gerös hi-j zol ’t doen.
Zei dan tot de olde lu-j, “Zeg wettie nog van toen?”

               Refrein:

               Op ’t Bänkske, op ’t Bänkske, op ’t Bänkske op de Wal.
               Daor ku-j vri-je, daor ku-j vri-je, ook al is ’t Carnaval.
               Op ’t Bänkske, op ’t Bänkske, op ’t Bänkske op de Wal.
               Daor ku-j soms wat belève, op den Bank daor op de Wal.

Meer as honderd jaore hen, vri-jt daor ’s-Heerenberg.
’s-Marges vroeg en ’s-aoves laat, wödt daor wat geverg.
Jong en old is daor present, geleuf dat now van mien.
Vri-je is ’n mooie “sport”, maor ik drink liever wien. 

               Refrein 2x.