't Carnavals-seizoen 2015-2016 lig alweer 'n hötje achter ons. De Pers- en Propaganda commissie van d'Olde Waskupen lei-j 11 vraoge aan Prins Wim II veur. Lèès hieronder die vraoge en zien antwoorde.

Op welk moment wier d'r met ow contac gelei-jd deur de vereniging naodat gi-j gekoaze was deur de leje van d'Olde Waskupen met de Algemene Lejevergadering?
Zoas gebruukelijk het de veurzitter ’s-aoves nao 't telle van de stemme mien vrouw gebeld met de mededeling: “Gefiliciteerd, Wim is gekoaze tot prins van d‘Olde Waskupen.” Daornao het hij nao 'n dag of twee 'n bezuuk gebrach um mien pesoonlijk te fillicitere en de vervolgafsprake te regele.

Hoe zage de vervolgstappe d'r uut? 
As eerste he'k naogedach eûver 't ontwerp van mien onderscheiding. Dat is mien haos volledig geluk. Alleen op 't lèts he'k de hulp van 'n professional ingeschakeld. Daorveur zun wi-j same met Annie Hendricksen en Marjolein Nijland midde in de zommer naor 'n stoffezaak gereje en hebbe daor de stof en ander materiaal veur 't prinsepak uutgezoch en gekoch. Ook zun wi-j den dag naor 'n andere zaak gereje waor wi-j de steke hebbe besteld die van de eigeste stof zun gemaak as mien pak en de cape. Dit was 'n geweldige dag. Ook heb ik same met mien adjudante en de echtgenotes alvas 'n opzet veur 't programma gemaak.

De november pronkzitting wier dit jaor in 'n verni-jend jäske gestoake onder de noemer pronkzitting 'ni-je stijl', wat was ow indruk hiervan? 
D'r zate goeie ideeë bi-j. 't Programma is met meer snelheid eûver de bühne gegaon. Ik heb getrach op veur mien belangrijke onderdele op de rem te trappe en niet alle tradities in één keer eûverboord te gooie. Dit moes in 't geheim via de veurzitter lope. Uuteindelijk zun mien wense gehonoreerd en zun d'r aan 'n aantal zake niks veranderd. Dit kump mede deurdat ik niet helemaol ni-j bun in 't carnavalsgebeure maor al 'n paar jaor metdree-j. Veur de toekoms zit hier veur 'n ni-je prins meugelijk 'n valkoel. 

De Waskupen pakte dit jaor ook weer groots uut met Pronkzitting XL, hoe heb gi-j en 't gevolg dit fenomeen ervare? 
'n Fantastisch fees. 't Traditionele carnavalviere wödt wel naogenoeg los gelaote. Dit is now eenmaol de 'moderne tied'. Op zich niet verkeerd maor ook hier geldt maak veranderinge in niet al te grote stappe um minse aan 't carnaval te blieve binde. Veur de res is 't 'n mega fantastisch gebeure gewèès. Bi-j de veurbereiding van mien toespraakje had ik besloate um 't woord amateurs niet te gebrueke. Dit zol gin rech doen aan de kwaliteit van de artieste die 't stadium van amateurisme ver ontstege zun. Toch glipte mien dat woord uut de mond en viel ik efkes stil. Dit het geleuf ik gelukkig niemand gemark. Op de vraog: wat duut de prins eigelijk op 't podium? Antwoordde ik : ''Wet ik niet maor ik vermaak mien kostelijk''!

De rondgang naor buurte, straote, wagebouwers, buurtvereniginge brink ieder jaor weer vol spektakel met zich met, hoe is dit ow bevalle? 
Geweldig. Met één uitzondering. Wi-j konde de bouwgroep niet vinde en de betreffende contactpersoon had zien telefoon niet bi-j zich. Uuteindelijk is dit met 'n tweede bezuuk wel goed gekomme. Maor dit vergètende, wanneer gi-j bi-j de buurte en straote bunt besef gi-j pas wat carnaval te wèèg brink. Want dit is 't mees sociale gebeure van 't hele jaor dat ech same gevierd wödt. Daor is weinig met te vergelieke. Kom gi-j örges te wone, ku-j jaorelang goeiemarge en goeiemiddag tege de res van de straot zegge. He-j same één jaor de wage gebouwd of de straotversiering opgehange dan ken gi-j de bure bi-j veurnaam en bu-j op visite gewèès. Ik bedoel maor.

Op welke manier kiek gi-j terug op 't afgelope carnaval?
't Was 'n aaneenschakeling van hoogtepunte. Toch wil ik, zonder de andere gebeurtenisse te köt te wille doen, d'r twee uutlichte.

Wat ware hierbi-j de hoogtepunte?
Bi-j 't uutreike van de onderscheiding aan Dirk Slok he'k gemark wat veur sommige minse de betekenis van 'n onderscheiding kan zun. Bi-j de toelichting waorum Dirk onderscheide wier en hoe ik de onderscheiding heb ontworpe en waor deze veur steet, stond ik te praote veur 'n volle kroeg waor da-j op dat moment 'n speld kon heure valle. Indrukwekkend.

Welke gebeurtenis heeft het meeste indruk gemaak?
Op carnavalsdinsdag viel mien de eer te beurt om Johnny van Uum te magge onderscheide. Hij had toen al 'n zeer slechte gezondheid. Wi-j zun met vier man bi-j um 'n klein kwartierke op visite gewèès. Vier wèèk later is Johnny eûverleje. Maor as ik dan heur dat op zien kis 'n foto stond van 't moment van uutreike van de onderscheiding en dat den onderscheiding tusse de bloeme lag. Emotioneel, dat vergèèt gi-j niet.

De optoch was dit jaor grootser dan groots, welke wage(s) of groep(e) zun ow bi-jgebleve?
Ik heb niet ech 'n groep of wage den direc in mien gedachte komp. Wel vond ik 't contac met de minse, al was 't vri-j köt, fijn. Veur 't begin van de optoch langs de minse lope en hen succes te wense is ook weer één van de dinge die gi-j as prins mag belève.

Gi-j heb met name de vri-jdag en de maondag same opgetrokke met de Jeugprins en zien gevolg. Hoe heb gi-j dit ervare?
't Is geweldig um te zien hoe de jeug dan optreedt. Ik heb die dage geprobeerd um zovöl meugelijk aan de zietkant te staon en Tieme alle aandach te laote kriege. Ook heb ik bewondering veur de minse van de jeugcommissie en de olders en alle andere betrokkene die dan in de weer zun um 't geheel ordelijk en leuk te laote verlope. 't Bezuuke van de schole is altied 'n hele happening. Zo spontaan as kindere zun is 'n belèvenis um te ontholde. Nao de basisschool verlere ze dit heel snel. De maondag is de dag van de optoch veur de jeugprins. Ik mag dan met op zien prinsewage. Zo kiek ik d'r tege aan. Achter de belangrijke man Tieme staon en geniete van al wat zich veur, nève en achter de wage afspölt. HEERLIJK.

Heb gi-j nog tips veur de toekomstige prins?
Nem meteen nao de prissetatie contac op met de veurige prins en nem zien programma deur. Gi-j besprèèk dan automatisch 't hele gebeure. De ni-je prins kan daormet zien veurdeel doen.