De warkende leje van carnavalsvereniging d'Olde Waskupen hebbe met de letste algemene lejevergadering twee ni-je leje geballoteerd. De here Thiemo Kaaf en Geraldo Brugman hebbe hun ballotage geaccepteerd en in dit artikel stelle ze zich graag efkes veur.

Thiemo Kaaf

'n Paar jaor geleje trok ik de stoute schoen aan en liep ik de Gerrit Heuvelinghal binne.
Ik kan wel zegge dat ik in 'n warm bad terech kwam. Zo goed wier ik daor ontvange.
Ik heb mien toen as vri-jwilliger bi-j de Pers- en Propaganda commissie aangesloate en inmiddels al aan 'n paar Waskuupkrante mien aandeel magge hebbe.

't Afgelope jaor hebbe de leje van cv d’Olde Waskupen mien 't vertrouwe gegève en moch ik as Prins Thiemo I d’Olde Waskupen veurgaon in 't mooiste fees dat ’s-Heerenberg riek is. Mienzelf is daordeur 'n onvergètelijk jaor gegund.

Onlangs kreg ik 't verzeek of ik 't warkend lidmaatschap en de daorbi-j beheurende take wilde aanvaarde. As carnavalis hoefde ik daor niet eûver nao te denke. Ik mag meinzelf now dan ook warkend lid nuume van één van de mooiste vereniginge van ’s-Heerenbarg. cv d’Olde Waskupen.

Ver diegene die ’t nog steeds niet wette:
Mien naam is Thiemo Kaaf. Ik bun op 22 november 1965 in Bèèk geboare en woon sins 1968 in ’s-Heerenbarg. Ik woon same met José Span op de Jeckebult (De Hucht) in 's-Heerenbarg. Wi-j hebbe één zoon den naor de naam Evan luustert. Ik wark as Bim-modelleur / projectcoördinator bi-j Geesink Weusten Architecten in Arum. Mien hobby’s zun mien gezin, klusse, de Jeckebult, familie en vriende en mien wark. Maor boavenal Carnaval!

Geraldo Brugman

Bi-j deze stel ik mien efkes veur: mien naam is Geraldo Brugman, ik bun gebore op 16 december 1968 te ‘s-Heerenbarg.

Ik woon samen met mien vriendin Yvonne en same hebbe wi-j twee kindere. 'n dochter Laura van 8 en 'n zoon Ruben van 12 jaor. Mien hobby’s zun carnaval en motor ri-je. In 't dagelijks lève mag ik leiding gève aan mien bedrijve, dit doe ik dan ook met vol passie en plezier.

As klein kind liep ik al met in de optoch en dat doe ik nog altied. De letste 11 jaor met cv Van Alles Wat waor ik Eckhard heb lere kenne. Zoas vol minse al wel wette heb ik 't genoege gehad um prins Eckhard te magge bi-jstaon as adjudant.
Ik moch 't carnaval 's van 'n andere kant bekieke. Dit is 'n geweldige ervaring gewèès den ik zeker niet had willen misse. Dit deed mien ook besluute um mien meer in te gaon zette veur d'Olde Waskupen. Ik ben toegetreje tot de Innovatie Commissie.

 Verder help ik bi-j 't klaormake en opruume van de spothal veur de novemberpronkzittinge en pronkzitting XL. Daornaas heb ik warkzaamheje verrich veur de horecacommissie en dat is mien goed bevalle. Dit zal ik zeker blieve doen.

Zo genoeg eûver miezelf. A-j nog wat wil wette, dan vraog 't mien maor.