Veurig jaor is geblekke dat steeds meer carnavaliste de prestatietoch van d‘Olde Waskupen op carnavalsdinsdag de moeite weerd vinde. D’r ginge 351 feesvierders op pad en dat ware d’r dik honderd meer as ’t jaor daorveur. De eigeste nege horecabedrijve die veurig jaor metdei-je hebbe now de deur ook weer op tied los. De organisatie en de bedrijve bun op nog meer vrolijke lu-j veurbereid.

Tusse 11.11 uur en 11.55 uur kö-j bi-j Café ’t Olde Veld de startkaart ophale, ow eerste stempel laote zette en dan in willekeurige volgorde ow route lope. Wel mo-j d’r veur zörge da-j um 17.00 uur bi-j de Peer, de Dolle Graaf, de Snor, de Grach, Smouze, Snackrestaurant Stadsplein, Heitkamp en de Lantscroon bunt gewèès um ow kaart af te laote stempele. Nao 17.00 uur wödt d’r dus niet meer gestempeld.

Alle kasteleins hebbe op vertoon van de kaart ’n kleine verrassing in petto en a-j wilt, blief gewoon ’n hötje hange. Snelheid is gin thema den dag, maor wel de gemuutlijkheid van die deurgewinterde Waskupen en buutelandse carnavaliste, die ook dan nog in staot zun um op pad te gaon. 

De vereniging het ook nog ’n blievend aandenke veur de volholders bedach. ’t Motto veur den dag is gin verrassing. ZO GEET DAT!