Op zaoterdag 13 september is 't eindelijk zowiet. Dan vindt 't grote oapeluchconcert van de Barghse Jonges en de Bläck Fööss plaats. 't Concert wödt geholde bi-j de olde grens tusse ’s-Heerenbarg en Emmerik. De handen zun inéén geslage um gezamelijk 'n gigantisch projec op te zette en zo geld in te zamele veur zowel de Nederlandse as Duitse kankerbestrijding.

De link

Heel vol minse könne zich 't ontstaon van de Barghse Jonges nog wel herinnere. 't Begon immers allemaol in 1986 op de bühne van de pronkzitting van d‘Olde Waskupen. 't Is dan ook niet gek dat de link tusse de Barghse Jonges en d’Olde Waskupen onomstreje is. Vol ‘Jonges’ zun warkend lid van d’Olde Waskupen en dat mik 't veur leje en andere carnavaliste al snel dat d'r gespraoke wödt van ‘onze Jonges’! De Barghse Jonges hebbe sinds 2002 met hun 3 CD’s en benefietconcerte al meer as € 200.000,- bi-j mekaar gespöld en afgedrage aan 't KWF Kankerbestrijding. De Kölse dialecband de Bläck Fööss is veur 'n zeer groot deel inspiratiebron gewèès veur de Barghse Jonges. Getuuge bekende nummers as Hipsepeûtje, Mien stad, Rommeloptoch, Gèèl en Zwat, Liebe deine Feinde en vol andere. Um dan same met ‘The Godfathers’, de Bläck Fööss, 'n benefietconcert te holde is veur de Barghse Jonges 'n kroon op hun jaorelange wark en inzet. 'n Select gezelschap Jonges is al enkele kere naor Kölle afgereis um wat zake te besprèke met de Fööss. Op vri-jdag 5 september reize de Jonges met z’n alle af naar Kölle, want van 15.00 tot 22.00 uur steet d'r 'n belangrijke ripetitie gepland. Hier wödt de complete setlist veur 't eerst same deurgenomme. Um in Waskupe-terme te sprèken; de ginerale ripetitie!

Same warke

Vanuut d’Olde Waskupen zun d'r tal van warkende leje (en hun pesoonlijke netwarke) actief um de organisatie rondum dit concert te ondersteune. Ruum 50 man warke aan de techniek en logistiek.
Vanaf woensdag 10 september warke zi-j aan de inrichting van 't terrein en bi-jbehörende zake. D'r is zelfs 'n speciale commissie den zich eûver de VIP’s ontfermp um deze speciale gaste in de watte te legge. De commissie wark nauw same met de sponsorcommissie, den d'r veur het gezörg dat de organisatiekoste bepark blieve en vri-jwel alle inkomste könne deurstromme naor 't KWF. De horeca wödt verzörg deur vri-jwel alle ’s-Heerenbargse horecaondernemmers en deur zo’n 70 vri-jwilligers! Zi-j zörge dat de tapkrane oapen blieve en d'r van ieder uutgegève drankje € 2,- naor de kankerbestrijding geet. De programmering en financiën lope via Marcel Giezenaar, één van de Jonges en pioniers van dit gigantische projec.

Doel

't Streve van de Barghse Jonges en Bläck Fööss is om zo’n € 100.000,- op te hale veur 't goeie doel. Van iedere verkochte toegangskaart vloeit 't hele bedrag, € 22,-, naor 't goeie doel. Daor boave op kump dus nog de opbrengs van de drank en de spijze. Carnavalsvereniging d’Olde Waskupen en andere vri-jwilligers tone deur hun belangeloze inzet aan dat ‘scholder aan scholder’ gin loze uutdrukking is en helpe zo de Barghse Jonges hun doel te verwezelijke. De weersveurspelling is boavedien ook goed en de kaartverkoop geet erg hard. Daordeur liek 't beoogde doel meugelijk te zun.

Iedereen kan helpe um dit projec te laote slage. Koop 'n kaart, belèèf 'n geweldige aovond en strijd met tege kanker. Meer informatie is te vinde op www.concerttegenkanker.nl