Köt nao de zommervakantie komme de verschillende commissies van d’Olde Waskupen weer in bewèging, um zich zo veur te bereije op de pronkzittinge van november. De dansgarde is echter al lang en breed bezig.

Al in maart(!) starte zi-j met ‘t oefene van hun danse. Onder bevloage leiding van Silke Nijland wödt d’r gewark aan de pasjes veur de gardedans, de vri-je dans en solodans (funckenmariechen). De dans en muziek zun deur Silke uutgedach en wödt in blokke van 8 telle ingeslepe, waorbi-j ze eûveriges niet schroomp um ook eiges de vuutjes van de vloer te doen um één en ander toe te lichte! Nao de zommervakantie wödt ‘t oefene opgeschroef tot 2 oefenaovonde per wèèk um zo de perfectie d’r in te kriege.

Wie de dames met deze warme zommeraovonde zöt oefene, kan ’t met ons eens zun dat ‘t haos topsport is. ‘n Lange warming-up wödt meteen gevolg deur de geoefende blokke veur de gardedans. Daornao wodde d’r ni-je blokke van 8 telle aan vasgeplek. Op de kleinste details wödt gelet. Publiek aankieke, arm goed strekke, tigeliek danse. Met ‘t tweede uur dezelfde discipline, maor dan veur de vri-je dans. 

De dansgarde kent dit seizoen ’n ni-je samenstelling. Ilse Marissink en Vere Megens zun helemaol ni-j, terwijl Anne Hendricksen, Roos Stoffelen, Rowan Bijenhof, Cindy Visser en Gioia Tundo veurig jaor ook al van de patti-j ware. In november zette deze dames hun beste beentje veur om daormet ‘t publiek weer 3 schitterende danse veur te schöttele.