Dinsdagaovond 12 september was ‘t weer zowiet. De leje van de jeugcommissie en vertigewoordigers van de drie schole kwame in de kantine van de Gerrit Heuvelinghal same um de ni-je jeugprins en zien gevolg te kieze.

Onder ‘t genot van ‘n köpke koffie wier d’r aandachtig geluusterd naor ‘t oapeningswoord van veurzitter Vincent Surenbroek. ’n Lange lies met name wier d’r daornao uutgedeeld. Hoe kan ‘t ook anders, a-j ow opgèèf veur jeugprins of veur ‘t gevolg mo-j wel knettergek zun op ‘t carnavalsfees. En dat carnaval lèèf onder de kindere, bliek wel uut ‘t feit dat meer as 30 kindere zich opgegève hadde om deel te nemme. ‘n Spannend moment brak aan. De kandidaatjes die zich hadde opgegève veur ‘t jeugprinsschap, zun allemaol bekend met ‘t carnaval en de scholen waren ook allemaol positief eûver de kandidate. Maor d’r kan d’r maor één gekoaze wodde. ‘n Zwaore las op de scholders van de minse die moeste kieze want aan hun de keuze wie in ‘t jaor 2016-2017 de scepter geet zwaaie eûver Waskuupstad.

Naodat de briefkes verzameld ware trokke de veurzitter Vincent en sikretaris Michel Moll zich terug um eûver te gaon tot de telling. Nao ‘n kleine 5 minute kwame ze allebei met ‘n grote glimlach terug en deelde ze de leje en vertegenwoordigers met dat de ni-je jeugprins bekend is. Wat vol minse niet wette is dat d’Olde Waskupen ’t van belang vinde dat, buute de twee leje van ‘t bestuur, de naam van de prins niet bekend is bi-j eur leje. Tenslotte mot ‘t veur iedereen ‘n grote verrassing blieve wie d’r op zaoterdagmiddag 5 november op de buhne verschient. Nao de prinsverkiezing volgde in hoog tempo de verkiezing van ‘t gevolg. Allemaal kinderen die holde van carnaval. Wat zal d’r weer volop gedans en gespronge wodde. Wat te denken van de papa’s en mama’s, die trots as ‘n pauw langs de kant van de weg staon as de Raod van Xr wage of de prinsewage met de kinderoptoch veurbi-j trik? Momente um nooit te vergète.

Nao de verkiezing wier d’r nog efkes naogepraot onder ‘t genot van ‘n drankje en keerde alle deelnemmers tevrèje naor huus. De jeugdprins begeleiders zun al begonne um onze ni-je hoogheid veur te bereije op ‘t aankommende carnaval. Denk gi-j bi-j ow eiges: “dat wil ik ook wel ‘s metmake” laot ‘t ow olders wette en gèèf ow nao ‘t carnaval via de website van d’Olde Waskupen op veur één van de functies. Wie wet stao gi-j volgend jaor op één van de beide praalwages met de drukbezochte kinderoptoch 2017-2018. Veur meer informatie ku-j terech bi-j de veurzitter van de jeugcommissie Vincent Surenbroek, tillefoonnummer 06-48885318.