'n Herfsachtige kolde maondagaovond. 'n Ni-je Hoogheid veur de jeug van Waskuupstad. Maor wie is hij, waorum het hij zich opgegève veur Jeugprins en wat duut hij zoal in zien vri-je tied? Wi-j hadde nog vol meer vraoge, dus wier 't tied de warme winterjas aan te doen en te vertrekke naar de Dahliastraot in ’s-Heerenbarg.

Matthijs kwam net terug van de training van voetbalvereniging M.v.R. Meteen wier daormet onze eerste vraog beantwoord. De Hoogheid huldt van voetballe en dat zien wi-j ook terug op zien kamer. De wande in prachtig oranje met natuurlijk de wereldberoemde leeuw van de KNVB. Oranje is veur Matthijs 'n bisundere kleur en den komme wi-j de kommende maonde nog wel in 'n andere vorm tege. Nee, wi-j van de redactie verklappe niks. 
In 2016 was Matthijs vaandeldrager en zien bruur Lucas adjudant bi-j Jeugprins Timo I. Op de wage van de Raod van XI staon vond hij toen heel speciaal. Daor kwam ook 't gevuul dat hij dit wel vaker met wilde make. Meteen moeste wi-j met 't gesprek metkomme um de prachtige fotocollage, die zien olders Saskia en Sjoerd hebbe gemaak, te laote zien. Wi-j begrepe meteen dat wi-j hier te make hebbe met echte carnavaliste en die dat ook niet onder stuul en banke stèke.

In 2017 was Matthijs hofnar bi-j Jeugprins Jeb I. Now hij zelf de Hoogheid is wödt hij geholpe deur adjudanten Ruben Gerritse en Sem Derkse. Wie ook genuump mot wodde is Dann Schmitz den as President 'n belangrijke functie het. Ze spölle ook in 't eigeste team bi-j M.v.R. Dit is ech 'n mooi clubke bi-j mekaar, die 't met de carnaval vas en zeker goed met mekaar könne vinde.

Matthijs wilde al heel lang Jeugprins wodde. In groep 4 in 't jaor 2016 was hij al schoolprins op OBS 't Montferland. Zittend in 'n doos op de klanke van 't nummer 'Er staat een paard in de gang' moes hij teveurschien komme. Maor Matthijs kwam niet teveurschien en blef gewoon röstig in de doos zitte. Hilarische momente spolde zich daorna af. Hij kan d'r nog steeds um lachen.
Opgève veur Jeugprins is één ding, maor gekoaze wodde is toch totaal iets anders. Op de bewuste aovond van de stemming lag Matthijs heerlijk te slaope. Zien vader en moeder kregge den aovond 't verlossende woord en hebbe de aanstaonde Hoogheid ook maor meteen wakker gemaak. 't Besef was d'r nog niet ech nao 't wakker wodde, maor dat kwam vanzelf toen Vincent, Pascal en Micha van de Jeugcommissie op bezuuk kwame um Matthijs en de hele familie te fillicitere.

Op 10 november was 't 'n drukte van jewelste in huuze Daams. De familie kwam op bezuuk, zelfs zien oom en tante uut Houte. Iedereen was bli-j verras en vonde 't o zo knap dat hij 't tege niemand het verteld. Niet tege zien familie, maor ook niet tege de kindere van zien voetbalteam. Matthijs zien mond blef op slot! 't Wier uuteindelijk 'n prachtige presentatie en Jeugpronkzitting op den bewuste zaoterdagmiddag.

De school wier in de wèèk nao de Jeugpronkzitting ook nog 's prachtig versierd en uut alles bliek dat d'r veur Matthijs maar één school is en dat is OBS. 't Montferland.
Naor zien zegge de leukste school van ’s-Heerenbarg en umgèving!

"Wi-j wette toch al heel vol van de Hoogheid, maor wat wil gi-j eiges nog meer kwiet?" Dat hadde wi-j bèter niet könne vraoge, want Matthijs kwam alweer met vol mooie verhale. 't Pak passe vond hij heel bisunder. Suzan het 'n mooi pak veur um in mekaar gezet, den hij ook met vol trots zal drage.
Gullie hebbe 't ontwerp van de onderscheiding nog niet gezien, maor deur ons bezoek viel ons de eer om 't te magge bekieke. Wat 'n prachtige onderscheiding het de Hoogheid. Helemaol zelf bedach en samen met Gaby (de grafisch ontwerpster) vormgegève. Wat 'n alleskunner is onze Hoogheid toch!

De Hoogheid het nog 'n enorme fan en dat is zien kanien Matti. Dit lieve dierke luustert goed. Of 't kanien 't trompet spölle ook zo fijn vindt vilt te betwiefele. Waor wi-j niet eûver twiefele is 't muzikale talent van Matthijs. Wi-j kregge toch efkes Mientje op trompet veurgeschötteld. Ons advies aan de diverse Dweilorkeste is dan ook um deze kanjer in de gaten te holde. Hier könne gullie in de toekoms nog vol plezier aan belève.

Muziek make en voetballe zun de grote hobby’s. Maor now is 't carnaval wat de klok slöt! Toch miek zien breje glimlach ook efkes plaats veur 'n snik in zien stem. Zien lieve opa, den deur iedereen ook opa buurman wier genuump kan d'r helaas niet meer bi-j zun. Hij is 'n half jaor geleje helaas eûverleje. Maor wi-j as ridactie wette zeker dat Matthijs zien opa heel arg trots naor zien kleinzoon vanuut de hemel zal zwaaie en deur niemand vergète wödt.

't Lied veur XS 2019 is in veurbereiding en d'r wödt al druk geoefend. Wat de Hoogheid 't leukste zal vinde is toch wel 't bezuuk aan de schole, de boog bi-j de residentie zette en op de hoogste trede van de prinsewagen staon. Hij kik veural uit naor 't belève van de optoch. Met vol kindere en olders as toeschouwers.
Zelf het hij vaak metgelope en wat zeker genuum mot wodde is dat hij same met zien vader 'n prijs het gewonne met “Wi-j hebbe 'n golde band”

Matthijs I zit vol energie! De schuur van de residentie wödt langzaam umgetoverd tot 'n waar paleisje met 'n heus podium. De Hoogheid verwelkomp bi-j deze ook al zien grote veurbeeld Bert III waor hij spoedig met kennis hoap te make. Dat wödt 'n geweldig duo, geleuf ons maor.

Jeugprins Matthijs I zal ollie zeker niet teleurstelle en alles gève um d'r onder 't motto 'Dat wödt wat' 'n mooi carnavalsfees van te make.

ALAAF!