Ni-je leje veur Technische Commissie
Technisch mo-j op 'n bepaold gebied wel behoorlijk vakkundig zun en in ieder geval ow hande uut de mouwe wille stèke. Dat zun de basisveurwaarde um lid te könne wodde van Technische Commissie van d’Olde Waskupen. 'n Goed humeur, dat alleen maor toenimp op de dinsdagaovend is ook 'n welkome eigeschap. D'r is altied zinvol wark te doen en nao dat wark smik 't pilsje extra goed in de kantine. Zo is de wage van de Old-Prinse goed onder handen genomme en ri-jklaor gemaak veur de kommende jaore. Daornaos könne de technici zich uutlève op 't bouwe van 'n ni-je wage veur de Raod van XI. 'n In goeie staot verkerende DAF uut 2002 wödt zodanig aangepas dat deze in de toekoms kan diene als passend voertuug veur de "Allense Keerls”.
Ook zun de manne now al weer bezig met de prinsprissentatie veur de pronkzittinge in 't weekend van 11 en 12 november. De ni-je prins carnaval veur 't kommende seizoen is inmiddels al gekoaze met de conclaafvergadering van afgelope 24 juni. D'r wach 'n spetterende prissentatie met de neudige effecte um de spanning te verhoge. De TC kump ook jaorlijks twee keer bi-jmekaar zonder ech te warke, één keer in de zommer en vlak veur Kersmis wödt de “Verzoendag” geholde. De zommerborrel wier genuttig op 16 juli jl. Daor wiere twee ni-je TC leje geïnstalleerd. Jan Rèèssink en Maddy Schmitz krège deur commissieveurzitter Stefan Tersteeg 't officiële TC-speldje opgespeld. Nao die installatie konde de beije ni-jkommers meteen op 'n bi-j hun passende manier aan de slag. Jan wier, gezien zien ervaring in de horeca aan de barbecue gezet en veur Maddy was d'r 'n bi-j zien lèèftied passend springkusse, beschikbaar gesteld deur Old-Prins Vincent Surenbroek, den de TC 'n warm hart toedrig.
